जनक पाण्डे
सुनसरी÷मुलुकमा कोरोना संक्रमणको ग्राफ बढेसंगै अहिले स्थानीय स्तरमा समेत खोपबारे नागरिकहरुको चासो र चिन्ता बढ्न थालेको छ । मोरङ्गमा पहिलो डोजको खोप लगाएका नागरिकहरु दोस्रो डोजको खोप लगाउन पाइने हो या नपाइने हो कि त कहिले पाइने हो ? भनेर आ–आफ्नो पायक पर्ने नगरपालिकामा फोन गर्ने गरेको बिभिन्न पालिकाको कार्यालयहरुले जनाएका छन् । उर्लाबारी, पथरीशनिश्चरे, बेलबारी नगरपालिकाहरुमा नागरिकले कोरोना भाईरस बिरुद्धको खोपबारे टेलिफोनबाट चासो ब्यक्त गर्ने गरेको नगरपालिकाको कार्यालयहरुले जनाएका छन् ।
त्यसैगरी, मोरङ्गकै सुन्दरहरैंचा नगरपालिकामा पनि खोपबारे नागरिकले सोध्ने गरेको नगर प्रमुख शिवप्रसाद ढकालले जानकारी दिएका छन् । सरकारले खोप पठाए आफुहरुसंग योजना र म्यानपावर दुवै भएकाले तुरुन्त खोप लगाउन सुरु गर्ने सुन्दरहरैंचा नगरपालिका नगर प्रमुख ढकालले बताएका छन् ।
‘सरकारले खोप नदिई कसरी लगाउने...?’ संघिय सरकारले खोप पठाउन नसकेको भन्दै नगर प्रमुख ढकालले भने– ‘हामिसंग प्लानिङ्ग छ, म्यानपावर छ खोप पाउने बित्तिकै सुरु गर्छाैं’ । अहिले आफूलाई चाहिएको असी हजार डोज खोप नगरले माग गरिरहेकोछ । तर सरकार अलमलिएको अवस्थामा रहेको नगर प्रमुख ढकालले बताएका छन् । हिजोका दिनमा खोप लगाउन सबै डराएको स्थिति थियो । आज सबै आत्तिएको यो अवस्थामा खोपको माग पनि बढ्दो रहेको बताउँदै अहिले सत्प्रतिसत नागरिकहरु खोप लगाउन चाहेको कुरा पनि नगर प्रमुख ढकालले जानकारी दिएका छन् ।
उता, पथरीशनिश्चरे नगर पालिकाले संघिय सरकारले खोप पठाएको भोलिपल्ट नै नगरले खोप लगाउन सुरु गर्ने बताएको छ । जेठ पहिलो हप्ता भित्रमा स्वास्थ्य मन्त्रालयबाट खोप पठाउने सूचना आएको र ६ गते खोप पाए आफूहरुले ७ गते बाटै खोप कार्यक्रम सुरु गर्ने पथरीशनिश्चरे नगरपालिकाका प्रमुख दिलिपकुमार राईले बताएका छन् ।
त्यस्तै बेलबारी नगर पालिकाले यो खोप आफ्नो बुतामा भएको भए नगरवासीहरुलाई लगाइसक्ने बताएको छ । खोप केन्द्रबाट आउने हो अहिले आएको छैन खोप प्राप्त गर्न नगरले समन्वय गरिसकेको र आफुहरुले प्राप्त गर्ने बित्तिकै नागरिक स्तरमा खबर गरेर खोप कार्यक्रम सञ्चालन गर्ने बेलबारी नगरपालिकाका नगर प्रमुख ज्ञानेन्द्र सुवेदीले बताएका छन् ।
उता उर्लाबारी नगरपालिकामा खोप ६ गते मोरङ्ग जिल्लामा आइपुग्ने भएको र नगरले जेठ ११ गते देखि वडाहरुमा खोप लगाउन सुरु गर्ने जनाएको छ । खोपका लागि नगरबासीको समेत चासो रहदै आएकोले नगरले पहल गरेको र ११ गते देखि खोप कार्यक्रम सञ्चालन गर्न आफूहरुले तयारी थालेको नगर प्रमुख खड्ग फागोले जानकारी दिएका छन् ।
मुलुक कोरोनाले आक्रान्त बनिरहेका बेला आफ्ना नागरिकको जिवन रक्षा गर्नु सरकारको पहिलो जिम्मेवारी हो । मंगलबार साँझसम्म देशभर ८ हजार दुई सय ३ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयको तथ्यांक अनुसार २० हजार ९ सय ७९ जनामा कोरोना परिक्षण गरिएको थियो । यो अवधिमा थप एक सय ९६ जना कोरोना संक्रमितको मृत्यु भएको छ । यो सँगै मृत्यु हुनेको जम्मा संख्या पाँच हजार चार सय ११ पुगेको छ । ६ हजार ८ सय ९१ निको भएर घर फर्किएको मन्त्रालयले जनाएको छ ।
फाल्गुण महिनामा पचास बर्ष भन्दा माथि उमेर समूहका जेष्ठ नागरिकलाई पहिलो चरणमा लगाइएको खोपको दोस्रो चरणको मात्रा तीन महिना कटिसक्न लाग्दा पनि सरकारले खोप दिन सकेको छैन । दोस्रो चरणको खोप कहिले आउला र लगाउने भन्नेबारे स्थानीय सरकार अझै अलमलमा परेको देखिएको छ । अर्कातिर नागरिकहरु कहिले खोप लगाएर यो महामारीबाट सुरक्षित हुन सकिएला भनेर खोपको पर्खाइमा बसिरहेका छन् । कोरोना बिरुद्धको यो खोप तीन महिना भित्रमा दोस्रो मात्रा डोज लगाउनु पर्ने भन्ने स्वस्थ्य निर्देशिकामा रहेको छ ।
