इटहरी । भदौ १० गते आएको भोटेकोशी बाढीमा बेपत्ता भएका बराहक्षेत्र नगरपालिका–५, माझीटोलका ४७ वर्षीय मोहनलाल माझीको परिवारसँग कोशी प्रदेश सरकारकी भौतिक पूर्वाधार राज्यमन्त्री सपना परियारले मंगलबार भेटघाट गरेकी छन् ।
मोहनलालकी श्रीमती चन्द्रकला श्रेष्ठ माझीसहित परिवारसँग भेट गर्दै राज्यमन्त्री परियारले उनको खोजी तथा उद्धारका लागि प्रदेश सरकारले गरिरहेको पहल र प्रयासबारे जानकारी दिइन् । मोहनलाल रोशन हाइड्रोपावर अपर त्रिशुली चाइना कम्पनीमा सुरक्षा अफिसरका रूपमा कार्यरत थिए ।
यसैगरी, राज्यमन्त्री परियारले सोही बाढीमा बेपत्ता भएकी बराहक्षेत्र नगरपालिका–३, भरौलीकी २२ वर्षीया रुवीना धामीको परिवारसँग पनि भेट गरेकी छन् ।
धामी खोरसयाङ थोकरको होटल कैलाश, टिमुरेमा कामदारका रूपमा कार्यरत थिइन् । बाढीपछि बेपत्ता भएकी उनको खोजी तथा उद्धार र पीडित परिवारका लागि राहतका विषयमा भइरहेको प्रयासबारे राज्यमन्त्रीले जानकारी दिइन् ।
बाढीमा आफन्त बेपत्ता भएपछि दुवै परिवार चिन्तित छन् ।
