धरान । भाद्र १० गते आएको अपर त्रिशूलीको बाढीमा बेपत्ता भएका सुनसरीको धरान–६ पानमाराका जियोलोजिस्ट मुकेश नेपालको परिवारसँग कोशी प्रदेश सरकारकी भौतिक पूर्वाधार विकास राज्यमन्त्री सपना परियारले भेटघाट गरेकी छन् ।
राज्यमन्त्री परियारले आइतबार मुकेशका बुबा केशव नेपाल, आमा मेनुका नेपाललगायत परिवारका सदस्यसँग भेट गरी दुःखमा प्रदेश सरकार साथ रहेको बताइन् ।
२०५५ साल मंसिर २३ गते जन्मिएका मुकेश भूगर्वविद् हुन् । उनी फेवा कन्स्ट्रक्सन जलविद्युत आयोजनामा कार्यरत थिए । अपर त्रिशूलीमा आएको बाढीपछि उनी बेपत्ता भएका हुन् ।
परिवारलाई भेट्न राज्यमन्त्री परियारसँगै नेपाली कम्युनिष्ट पार्टीका केन्द्रीय सदस्य मुक्सामहाङ मेन्याङ्बो (मुकेश), चोत्लुङ, सन्त तेम्बेलगायत नेताहरू पनि पुगेका थिए । उनीहरूले मुकेशको परिवारलाई सान्त्वना दिएका थिए ।
