इटहरी । सुनसरीको इटहरीमा ऐतिहासिक प्रथम राष्ट्रिय कोबुदो विशेष ‘किहोन’ सेमिनार दुई दिनसम्म भव्य रूपमा सम्पन्न भएको छ । नेपालका विभिन्न प्रदेशहरूबाट सहभागी वरिष्ठ प्रशिक्षक तथा खेलाडीहरूको उल्लेखनीय सहभागिता रहेको उक्त सेमिनारले नेपाली कराते खेल क्षेत्रमा थप उपलब्धी हासिल भएको छ ।
दुई दिने सेमिनारमा जापानबाट आएका करातेका ओल्ड ग्रान्ड मास्टर गियो गिबो सहित १२ जना वरिष्ठ प्रशिक्षकहरूले विभिन्न विधामा कोबुदो तथा करातेका विशेष कौशल प्रदर्शन गर्नुका साथै प्रशिक्षण प्रदान गरेका थिए ।
‘शान्ति–मित्रता–एकता’ भन्ने मूल नाराका साथ कार्यक्रम सञ्चालन गरिएको हो । सेमिनारको संयोजन गणेश कटवालले गरेका थिए भने कार्यक्रमको सभापतित्व नेपाल करातेका ग्राण्ड मास्टर मदनकुमार उप्रेतीले गरेका थिए ।
कार्यक्रमका प्रमुख अतिथि कोशी प्रदेशका मुख्यमन्त्री हिक्मतकुमार कार्कीले खेलकुदको विकासमा खेलाडीहरूको योगदानको उच्च मूल्यांकन गर्दै राज्यबाट अपेक्षित सहयोग पुग्न नसकेको स्वीकार गरे । साथै, प्रदेश सरकारले आगामी दिनमा खेलकुद क्षेत्रलाई प्राथमिकतामा राख्दै विशेष कार्यक्रमहरू ल्याउने प्रतिबद्धता व्यक्त गरे ।
जापानी प्रशिक्षक गियो गिबोले नेपाल–जापान सम्बन्धलाई करातेजस्ता मार्शल आर्टहरूले अझ सुदृढ बनाइरहेको बताउँदै खेलकुदले अनुशासन र स्वास्थ्य प्रवद्र्धनमा ठूलो भूमिका खेल्ने उल्लेख गरे ।
सेमिनारमा संविधानसभा सदस्य किरणकुमार राई, राष्ट्रिय खेलकुद परिषद्का वरिष्ठ प्रशिक्षक कालु मेचे, योगेन्द्र चाम्लिङ, नेपाल कराते महासंघका केन्द्रीय सदस्य मिलनकुमार प्रसाईं, प्रशिक्षक प्रभाकर रानामगर, मिना पाठक लगायतको उपस्थिति रहेको थियो ।
उक्त सेमिनारले नेपाली युवाहरूमा खेलकुदप्रति रुचि थप बढाउने विश्वास आयोजकहरूले व्यक्त गरेका छन् ।
