इटहरी । नेपाल कम्युनिष्ट पार्टी सुनसरी जिल्ला समितिको बैठक आइतबार सम्पन्न भएको छ ।
सुनसरीको इटहरीमा सम्पन्न भएको बैठकले गरेको निर्णय सार्वजनिक गर्न सोमबार सो पार्टीले पत्रकार सम्मेलन गरेको छ । यो पार्टीको नेतृत्व नेत्रविक्रम चन्द (विप्लव)ले गरेका छन् । सुनसरीको नेतृत्व डिबी सीले गरेका छन् ।
सो पार्टीले पत्रकार सम्मेलनमा वितरित विज्ञप्तिमा विभिन्न संघर्षका कार्यक्रम घोषणा गरिएको जनाइएको छ ।
पत्रकार सम्मेलनमा पार्टीका सुनसरी इन्चार्ज डिबी सीले समाजमा भएको जातीय विभेद र धार्मिक भड्कावको अन्त्य गर्न जनचेतनामुलक कार्यक्रम गर्ने बताए । उनले समाजमा बढ्दो महिला तथा श्रमिक समुदाय माथिको हिंसात्मक घटनाहरुलाई निस्तेज पार्न घटना स्थलमा तुरुन्तै पहलकदमी लिएर कार्बाही गर्ने आफ्नो पार्टीको योजना रहेको बताए ।
उनले छिमेकी देश भारतले खाद्य वस्तु चामलमा रोक लगाएर अन्य वस्तुहरुको बजार नेपाललाई बनाउने नियत राखेकोले त्यसको विरोध गर्न आफूहरु बाध्य भएको जानकारी दिए ।
विज्ञप्तिमा उल्लेख गरिएअनुसार सामुदायिक विद्यालयको विभेदपूर्ण र दोहोरो शिक्षा नीतिको विरोध गर्दै स्वास्थ्य शिक्षालाई सेवामुलक बनाउनु पर्ने भनिएको छ । साथै राष्ट्रिय स्वाभिमान र स्वाधिनतमा विदेशी हस्तक्षेप बढेको भन्दै एमसीसी र एपीपीको विरोधमा नेपाल कम्युनिष्ट पार्टी जस्तोसुकै संघर्ष गर्न तयार रहेको डिवी सीले बताए ।
पत्रकार सम्मेलनम लागूऔषध, जाड, रक्सी र जुवातास विरुद्धको कार्यक्रमलाई तिव्रता दिइने बताइयो । भ्रष्ट, कालोबजारी तथा दलाललाई कार्बाही गर्ने पार्टीको योजना रहेको इन्चार्ज डिबीको भनाइछ । प्राकृतिक सम्पदा, उत्खनन्, चोरी निकासी, कर छलीमा संलग्नहरुलाई कडा कडा भन्दा कडा कार्बाही गर्ने उनले उद्घोष गरे ।
भारतबाट भित्रयाउने तरबारीजन्य खाद्य वस्तुहरुलाई सुनसरीको सीमामा गुणस्तर परिक्षण अनिवार्यरुपमा गर्न पहल गर्ने र संघर्ष गर्ने सो पार्टीले जनाएको छ । मानव तस्कार, मिटर ब्याजी विरुद्धको संघर्षलाई तेज पार्ने, सुकुम्बासी समस्यालाई समाधान गर्न दबाब दिने, विकास निर्माणमा पालिकाहरुलाई सचेत गराउनेलगायतका संघर्षका कार्यक्रम पार्टीले अघि सारेको डिबीको भनाइछ ।
