विराटचोक । अपाङ्गता रोकथाम तथा पुनःस्थापना कार्यक्रमअन्तर्गत सुन्दरहरैंचाका बालबालिकालाई नेतृत्व विकाससम्बन्धी तालिम दिइएको छ । समावेशी बाल क्लब सञ्जालका लागि आयोजित तालीममा बाल सञ्जालका प्रतिनिधि तथा अपाङ्गता भएका बालबालिका गरी ४० जनाभन्दा बढी सहभागी थिए ।
तालीम समापन समारोहलाई सम्बोधन गर्दै सुन्दरहरैंचा नगरपालिकाका मेयर केदारप्रसाद गुरागाईँले बालबालिकाको क्षमता अभिवृद्धि गराई उनीहरुलाई हरेक क्षेत्रमा अघि बढाउने कार्यमा नगरपालिका सधैँ लाग्ने बताए । बाल सञ्जालको माध्यमबाट बालबालिकामा बढिरहेको आत्मविश्वासको आफूले मूल्याङ्कन गरेको बताउँदै उनले बालबालिकाले माग गरेका कार्यक्रम सञ्चालनमा नगरपालिका सदैव अग्रसर हुने प्रतिबद्धता जनाए ।
एक्लो व्यक्तिसँग प्रतिष्पर्धा नहुने र यस्ता तालिमले आत्मविश्वास बढाई जोसुकैसँग पनि प्रतिष्पर्धा गर्न सक्ने हिम्मतिलो व्यक्ति बनाउने हुनाले नेतृत्व विकास र क्षमता विकाससम्बन्धी तालिमको आवश्यकता परिरहने उनले औँल्याए । तालिममा रेडियो सुसेलीका कार्यकारी प्रमुख बाबुराम निरौलाले सहजीकरण गरेका थिए ।
