सोलुखुम्बु । थुलुङ दुधकोशी गाउँपालिका अध्यक्ष असिम राईले सामाजिक सुरक्षा भत्ता वितरणलाई सहजै प्राप्त गर्ने वातावरण निर्माण गर्ने प्रयास भइरहेको बताएका छन् । गाउँपालिका वडा नम्बर ८ बुडिडाँडामा लक्ष्मी बैंकको शाखा रहित सेवा उद्घाटन गर्दै अध्यक्ष राईले यस्तो बताएका हुन् ।
सामाजिक सुरक्षा भत्ता वितरणलाई पारदर्शी बनाउने गरि बैंकिङ प्रणाली लागू गरेको भएपनि भौगोलिक हिसाबले कठिन भएको भन्दै अध्यक्ष राईले वडा नं. ७ र ८ लाई लक्षित गरि बुडिडाँडामा सेवा सुचारु गरिएको बताए । यस्तै जुबु र लोखिमलाई लक्षित गरि केहि दिनभित्रमै सुकेपोखरीमा पनि यस्तै शाखा रहित सेवा सञ्चालन गरिने अध्यक्ष राईको भनाइछ ।
बृद्धबृद्धा तथा अपाङ्गता भएकाहरुलाई सामाजिक सुरक्षा भत्ता लिन बैंकसम्म पुग्दा असहजतासंगै महङ्गो समेत हुने भएकाले स्थानीय सरकारले सहजीकरण गरिदिएको गाउँपालिकाले जनाएको छ ।
लक्ष्मी बैंक मुक्लिबाट प्राप्त गर्ने सबै सेवाहरु शाखा रहित काउण्टरबाट प्राप्त गर्न सकिने बैंकका मेनेजर प्रेमबहादुर बस्नेतले बताए । अब देउसाका नागरिकहरु खाता खोल्न, सिमित रकम राख्न तथा पठाउन एमव् झिक्न सकिने उनको भनाई छ ।
स्थानीय सरकारले हरेक नागरिकको समस्यालाई मध्यनजर राख्दै भूगोल अनुसार टोलमा नै पुगेर भत्ता वितरण गर्ने व्यवस्था मिलाइने वडा नं. ७ का वडा अध्यक्ष भोजराज कार्कीले बताए । गाउँपालिका प्रवक्ता समेत रहेका कार्कीले वडा तहमा देखिएको समस्या समाधान गर्ने दायित्व वडा सरकारको भएकाले सोही अनुसार जिम्मेवारी बहन गरेको अवस्थामा नागरिकलाई सहजता मिल्ने उनको विश्वास छ ।
देउसामा सञ्चालित लक्ष्मी बैंकको उक्त शाखा रहित सेवाका सञ्चालक चुडामणि केसी रहेका छन् । उनले प्रभावकारी सेवा प्रवाहमा आफुले सक्दो प्रयास गर्ने प्रतिबद्धता व्यक्त गरे ।
